Мемлекетімізде орын алған саяси өзгерістерге байланысты, атап айтқанда, 2022 жылдың 16 наурыз күні ҚР Президенті Қ. Тоқаев Қазақстан халқына Жолдауында 1990 жылы басқа облыстармен біріктірілген үш облысты қайта құруға ұсыныс жасап, 2022 жылғы 4 мамыр күні Қазақстан Республикасының әкімшілік - аумақтық құрылысының кейбір мәселелері туралы Жарлыққа қол қойған еді. Онда жаңадан үш облыс құру туралы айтылған. Осы жаңадан құрылған үш облыстың бірі - Жетісу облысы.
Жетісу облысының филармониясы облыс әкімдігінің «Жетісу облысының мәдениет, архивтер және құжаттама басқармасы» мемлекеттік мекемесінің қарамағындағы ұйымдарды құру туралы 2022 жылғы 8 қыркүйектегі №35 Қаулысымен құрылды. Ұжымның директоры қызметіне талантты күйші, домбырашы, халықаралық байқаулардың лауреаты Самат Жанғазыұлы Джексембаев тағайындалды.
Ал 2023 жылы 5 шілде күнгі №208 Қаулымен филармония ұжымына Қазақстан Республикасының халық әртісі, әнші, сазгер Дәнеш Рақышевтың есімі берілді.
Әуезді әнші, саңлақ сазгер Дәнеш Рақышевтың есімі күллі елімізге кеңінен таныс. Көзі тірісінде «Жетісудың бұлбұлы» атанған ол өрелі өнерімен талайды тамсантып, иісі қазақтың сүйікті өнерпазына айналды. Сонымен қатар, бұл тұғырлы тұлғаның бүкіл қазақ ұлтының, оның ішінде жерұйығы Жетісудың мәдениеті мен өнерін өрістетуге сіңірген қайраткелік қызметі де ұшан - теңіз. Елдің өнер мұрасына үлес қосқан адам өзі де ел мұрасына айналады екен. Дәнеш Рақышевтың өзі де, өлеңі де - бұл күнде халық мұрасы.
Жерұйығы Жетісудың төрінен орын алған өнер шаңырағы шығармашылық ұжымдармен, кәсіби шеберлігі жоғары деңгейдегі әртістермен, өз істерінің қабілетті маманы болып табылатын өнерпаздармен толығып, ұлт мәдениетінің дамуына, өңір жұртшылығының музыкалық - эстетикалық тәрбиесінің артуына қызмет етіп жүр. Аз ғана уақыттың ішінде филармония әртістерінің есімдері Жетісу жеріне ғана емес, республикамызға, тіптен, алыс - жақын шетелдерге кеңінен танылып үлгерді. Бүгінгі күні қандай да биікке көтеріліп, абырой - беделге кенеліп жатса, бұл - ұжым еңбегінің жемісі. Оның дәлелі, 2024 жылы облыстық әкімдік тарапынан «Мәдениет және өнер қызметкерлері» мерекесі аясында филармония ұжымына «Үздік мәдениет мекемесі» атағы беріліп, автокөлік табысталды.
Жер жаннаты Жетісу ежелден - ақ асқақтаған әсем ән мен күмбірлеген күміс күйдің алтын арқауы, ағынды жырдың өлкесі ретінде белгілі. Әр бұтасына ән ұялап, әр сайынан саз қалықтаған Жетісу жері - Қазақстанның мәдени өмірінің жүрегі. Ол - дәстүр мен фольклордың қазынасы, ән мен күйдің әлемі.
Өңіріміздің өнері мен мәдениетінің негізін қалап, қалыптастырып, бүгінде қазақ өнерінің майталмандарына, ұлағатты ұстаздарына айналған Қапез, Сәдіқожа, Пішан, Кенен, Сауытбек, бертін келе Қарға, Әсімхан, Дәнеш сынды біртуар тұлғалардың ізін жалғастырып жүрген өнер ұжымының келешекте алар асуы мен қол жеткізер жетістіктері мол. Себебі, бұл өнер ордасында өз ісінің шеберлері мен жүрегінде ұлт мәдениетіне деген шексіз сүйіспеншілік орын алған өнерпаздар қызмет етеді.
Ұлт өнерін дамытуға қосқан зор үлесі мен еңбегі еленіп, Үкімет тарапынан ҚР еңбек сіңірген әртісі, ҚР еңбек сіңірген қайраткері, Мәдениет қайраткері, Мәдениет саласының үздігі, ҚР Жастар одағы сыйлығының иегері, Халықаралық және Республикалық байқаулардың лауреаты, «Құрмет» орденінің, “Ерен еңбегі үшін” медалінің иегері, «Еңбек даңқы» төсбелгісі иегері, ҚР Тәуелсіздігінің 10 жылдығы мен 20, 25,30 жылдығына арналған мерекелік медалінің иегерлері сынды марапаттар мен атақтарға ие болған әртістер саны өте көп.
Яғни, ұжымымыздың санына қарай сапа көрсеткіші де жоғары деңгейде екені көз қуантады.