Түндебаев Қанат Сайранұлы 1971 жылы 4 мамырда Алматы облысы Алакөл ауданы Қарабұлақ ауылында дүниеге келген. Жастайынан өнерге жақын ол мектепте өтетін шараларға қатысып, аудандық, облыстық байқауларда жүлделі орындарға ие болды. 1997 жылы Абай атындағы Алматы мемлекеттік Университетінің музыка факультетін аяқтаған. Ұстазы ҚР халық әртісі Қайрат Байбосыновтан Арқа, Жетісу әндері, жыр, термелерінің қыр - сырын меңгерсе, ҚР еңбек сіңірген әртісі Мұратбек Жүнісовтен әнді жүрегімен түсініп орындауды үйренді.
2005 жылға дейін мектептерде музыка пәнінің мұғалімі болып істеді. 2008 жылдан І.Жансүгіров атындағы мәдениет сарайында көркемдік жетекші қызметін атқарды. 2011 жылдан бері Сүйінбай атындағы Алматы облыстық филармониясында директордың орынбасары ретінде еңбек етіп, 2022 жылы осы лауазыммен Жетісу облысының Дәнеш Рақышев атындағы филармониясына қабылданып, қызмет етуде.
Қандай қызмет атқарса да, әншілігін тастамай, үнемі репертуарын жаңа әндермен толықтырып, әрдайым ізденіс үстінде жүреді. Бірқатар байқауларға қатысып, лауреат атағына ие болды.
Марапаттары мен жетістіктері:
Атап айтсақ, 2009 жылы облыстық Кенен Әзірбаев атындағы байқаудың Бас жүлдегері атанды, осы жылы республикалық Кенен Әзірбаев атындағы байқауға қатысып, «Белсенді қатысушы» атта марапатқа ие болды. 2010 жылы М.Мақатаевтың өлеңдеріне жазылған әндердің «Жырлайды жүрек» атты облыстық байқауында дипломант атанды.
2011 жылы Ел Тәуелсіздігінің 20 жылдығына орай өткен «Ән керуені» атты тележобаға белсене қатысқаны үшін Алматы облыстық мәдениет басқармасының Дипломымен, 2013 жылы филармония Бас директорының Алғыс хатымен, 2016 жылы Ел Тәуелсіздігінің 25 жылдығына орай салалық мәдениет, спорт, және ақпарат қызметкерлерінің кәсіптік одағының Құрмет грамотасымен марапатталды. 2016 жылы халықаралық «Түрксой» ұйымының Алғыс хатымен, 2017 жылы «Dombra party - non stop» атты шараға қатысқаны үшін Алматы облысының ішкі саясат басқармасының Алғыс хатымен, 2017 жылы «Алматы облыстық кәсіподақ орталығының Құрмет грамотасымен, 2018 жылы Алматы облысының мәдениет, архивтер және құжаттама басқармасының Алғыс хатымен, 2021 жылы Алматы облысы әкімінің Алғыс хатымен марапатталды. «Еңбек даңқы» төсбелгісімен 2022 жылы және осы жылы мамыр айында «Мәдениет саласының үздігі» төсбелгісімен марапатталды. 2025 жылы Жетісу облысының Дәнеш Рақышев атындағы филармониясы директорының Алғыс хатына ие болды.