2023 жылдың 2 қыркүйек күні облысымыздың Қаратал ауданында көрнекті жазушы Кемел Тоқаевтың 100 жылдық мерейтойы аталып өтті. Мерекелік шара аясында қазақ күресінен әлем кубогы, бәйге және бірқатар ұлттық ойындардан сайыстар өтті. Киіз үйлерде жиналған жұртқа ас беріліп, өнер жұлдыздарының және Жетісу облысының Дәнеш Рақышев атындағы филармониясы әртістерінің қатысуымен концерттік бағдарламалар көпшілікке ұсынылды. Өнерпаздарымыз бас сахнада, ипподромда және киіз үйде өнер көрсетті. Филармонияның фольклорлы-этнографиялық ансамблі, бишілері, «Dombyra Live» триосы, жеке дауыстағы эстрада, классик және дәстүрлі әншілер құлақтың құрышын қандырар әсем әндер, ұлтымыздың әуезді әуендері мен әсерлі билерін арда көңіл көпшілікке ұсынып, торқалы тойдың әрін аша түсті.
