2023 жылдың 25 ақпан күні Б.Римова атындағы драма театрында ақиық ақын, қазақ поэзиясының «Мұзбалағы» Мұқағали Мақатаевтың туған күніне арналған «Тағы да бір ақ таң, ақпанда» атты концерттік бағдарлама өтті. Аталмыш ән мен өлең мерекесінің шымылдығын филармонияның М.Төлебаев атындағы халық аспаптары оркестрінің сүйемелдеуімен «Браво» триосының орындауында «Саржайлау», дәстүрлі әншілердің орындауында «Шәлкөдем менің, Шәлкөдем», «Аягөз ару», «Үш меркі» әндері, «Талдықорған - әнім менің», «Кел, еркем, Алатауыңа» сынды әндері ашты. Филармонияның бишілер ұжымы концерттің шырайын «Көңілашар» биімен көркемдеп, Ескелді аудандық мәдениет үйінің, «Талдықорған әуендері» ФЭ ансамблінің әншілері ақынның өлеңдеріне жазылған танымал әндерді тебіренте орындады. Ал театр актерлары ақын өлеңдерінен композицияны нақышына келтіре оқып, сахналық қойылым барысында ақиық ақынның поэзиясына тоқталып кетті.
