Үстіміздегі жылдың 9 ақпан күні І. Жансүгіров атындағы мәдениет сарайында өз заманында қара өлеңнің қайсар шебері атанған, ұлт әдебиетінің дамуына өзіндік зор үлес қосқан лирик ақын Мұқағали Мақатаевтың туған күніне орай облыс өнерпаздарының қатысуымен «Тағы да бір ақ таң, ақпанда» айдарымен концерт өтті .Өнерімен елімізге ғана емес, алыс-жақын шет елдерге танымал Жетісу облысы филармониясы әртістерімен қатар, "Талдықорған әуендері " ФЭ ансамблінің өнерпаздары ақынның өлеңдеріне жазылған әсерлі әндерді орындады. Б.Римова атындағы драма театрдың жас актерлары мұзбалақ ақынның жүрек қылын тербететін өлең жолдарын оқып, көрермендердің көңілінен шықты.Ақынның сөзіне жазылған Н.Тілендиевтің "Сарыжайлау" әнімен басталған концерт әнсүйер әр адамның жүрегінен орын тапқан әндермен жалғасып, көркем билермен үйлесті.
Әуезді әуендерге толы әдемі кешке келген көрермен тағы да өнердің құдіретіне куә болып қайтты. Залға лық толған көрермендердің қошеметі мен ықыласынан бұл кештің рухани азыққа толы, керемет өнер мерекесі мен ақиық ақынның аруағына деген тағзым кеші болғаны қуантады.
